ԹՈՂԱՐԿՈՒՄ 3-ՐԴ. ԻՆՏԵՐԱԿՏԻՎ
Ինտերնետ պրովայդերները մոնիտորինգի տակ, կսահմանվեն որակի չափորոշիչներ: Հայաստանից Իտալիա ուղիղ կապ` օնլայն կրթություն Պերուջայի համալսարանում: Վիրտուալ աշխարհի ձեր անկյունը, ինչպես ունենալ կայք:
ՏՏ լուրեր
Մինչեւ տարեվերջ Հայաստանում ինտերնետով ապահովված դպրոցների թիվը կհասնի 1000-ի: Իսկ 2011-ին արդեն էլեկտրոնային մեկ միասնական ցանցում կլինեն բոլոր դպրոցները:
Հանրային խորհրդի վերջին նիստին, որին մասնակցել է նաև նախագահ Սարգսյանը, մասնակիցները քննարկել են ինտերնետի որակի խնդիրը: Շուտով ստեղծվելու է աշխատանքային խումբ, որն էլ մոնիտորինգի տակ կպահի պրովայդերներին:
Հայտնի Twitter սոցիալական ցանցում միկրոբլոգային գրառումներից բացի շուտով նաեւ գովազդ կտեղադրվի: Մինչեւ այդ հիմնական եկամուտը Twitter-ը ստանում է Bing եւ Google որոնողական համակարգերի միջեւ կնքված պայմանագրերից: Այն կազմել է 25 միլիոն դոլար:
Հեռահաղորդակցության միջազգային միությունը հրապարակել է ՏՏ զարգացվածության ինդեքսը: Երկու տարի անընդմեջ առաջատար է Շվեդիան: ԱՊՀ երկրներից առաջամարտիկը Ռուսաստանն ու Բելառուսն են:
Ամերիկացի յուզերն ընդդեմ Google-ի, գործը հասել է դատարան: Google Buzz ծառայությունն ակտիվացնելուց հետո GMail-ից օգտվողների շփումները որոշ ժամանակ հայտնի են դառնում գրեթե ողջ աշխարհին: Համակարգի թերացումների համար Google-ը ներողություն է խնդրել օգտվողներից:
Իմանալ ինչպես/ Know how?
Դուք էլ եք ուզում մեր բլոգ-աստղերից դառնալ, տեսեք` ինչպես, ընդամենը կես ժամ, ինտերնետ ու ստեղնաշար: Եթե դուք էլ եք ուզում երբեմն ցնդաբանել, ապա դիտեք ու իմացեք` ինչպես:
Կայքի անվանումը կոչվում է դոմեյն: Միջինը 13 հազար դրամով հնարավոր է գնել կայքի անվանումը` մեկ տարի ժամկետով: Նույն անվանումով ու հասցեով կարող է լինել ընդամենը մեկ դոմեյն: Com, ru, թե am… Յուրաքանչյուր տիրույթում էլ կայքի հնարավորությունները տեսականորեն նույնն են, միայն թե սկզբունքի հարց է. am-ը հայկական տիրույթն է: Եվ այն փոքր-ինչ թանկ է, պատճառը պահանջարկն է: Վերջին տասը տարում Հայաստանում մոտ 20 հազար կայք է ստեղծվել:
Մինչեւ տարեվերջ հայաստանյան հազար դպրոց կհայտնվի վիրտուալ աշխարհում: Առաջիկա ամիսներին 300 դպրոց պետբյուջեի եւ 450-ն էլ Համաշխարհային բանկի ֆինանսավորմամբ կդառնա ինտերակտիվ: Օնլայն բուհերը դեմոկրատ են` առանց սեռական ու տարիքային խտրականության` լանչն ու սուրճն էլ` վիրտուալ: Մի խոսքով` կրթվեք բազմոցին:
Գոհար Մանուկյան – Արամ Մկրյանն օնլայն կրթություն է ստանում Իտալիայի Պերուջայի համալսարանում, ստացիոնար սովորում է Երեւանի Բրյուսովի անվան համալսարանի մագիստրատուրայում:
– Այստեղ կա վիրտուալ լսարան, որտեղ հավաքվում ենք, կա ուսանողների սրճարան բաժինը, որտեղ խոսում ենք ոչ թե դասերի, այլ ցանկացած թեմայի մասին,- վիրտուալ կրթության հետաքրքիր կողմերն է ներկայացնում Արամը:
Սրճարանը վիրտուալ է, եւ համակուրսեցի Վիվիանայի հետ մեկ գավաթ սուրճ վայելելու հնարավորություն Արամը չունի: Որպես փոխհատուցում` ուսման վերջին երկու ամիսը նրա հետ կանցկացնի Իտալիայում: Նրանց այնտեղ սպասվում է փորձաշրջան եւ 15 բարդ քննություն:
– Դասախոսը շատ մեծ դեր չի խաղում: Ուսանողներն են իրենց կարծիքը հայտնում ֆորումներում: Յուրաքանչյուր ոք կարող է իրեն հուզող հարցեր բարձրացնել եւ պատասխաններ գրել,- Արամ Մկրյանն էլ նույնն է անում եւ դասախոսների ֆիզիկական բացակայությունից էլ չի նեղվում:
Հատկապես սփյուռքահայերի համար գործում է վիրտուալ քոլեջ, մտահղացումը Երվանդ Զորյանինն է:
– Դասախոսը միայն խոսելով չէ, որ նյութը ներկայացնում է: Դա անում է նկարներով, տեքստով, ֆիլմերով եւ այլն: Մոտեցումն արդիական է, եւ ժամանակի ազատություն ունես,- վիրտուալի արդյունավետության մասին պատմում է հենց ինքը` Երվանդ Զորյանը:
Կրթության եւ գիտության նախարարությունն առայժմ չունի վիրտուալ ուսուցման չափորոշիչներ: Հայաստանում վիրտուալ ուսուցումը միայն առանձին կրթարանների մենաշնորհն է: Առայժմ: Օրիորդ Լիանան առաջադրանքն ուղարկում է երեխաների էլեկտրոնային փոստին: Վայրկյաններ անց սկսվում է դասը: Մխիթար Սեբաստացի կրթահամալիրի ուսուցիչներն ազատագրված են աշակերտների կավճոտ ծուղակներից: Էլեկտրոնային գրատախտակներ. ահա նոր ուսուցման պատասխանն արկածախնդիր աշակերտներին:
– Կարող եմ վերցնել որեւէ գործիք, օրինակ` մատիտը եւ բացատրելու ժամանակ հանգիստ գծել բառի տակ, առանձնացնել այն կամ ինչ-որ բան գրել,- Նոր դպրոցի արդի ուսուցման տեխնոլոգիաներն է բացահայտում Նոր դպրոց ծրագրի ղեկավար Նառա Նիկողոսյանը:
Ժամանակն է ունենալ վիրտուալ մեծ աշխարհի մեր անկյունը:
Հաղորդումն ամբողջությամբ, վիրտուալի վիզուալ մանրամասներով դիտեք այստեղ:
